Karya: Iverdixon Tinungki
KORE BAKU KORE
orang manado ada hobi kore baku kore
mar awas jangan salah kore
tasalah kore di tampa bekeng totofore
dorang paka sampe gigi samua rope
urusan kore sama deng urusan bakukode
kore di tangang depe kode tamang
kore di pinggang depe kode sayang-sayang
kalu kore di biji mata, itu cari cilaka
dorang tarapu sampe bangka-bangka
bulungle ngana trima dia momake dari binatang
sampe nene moyang deng setang pe nama
ta cumu-cumu sama-sama deng ngana pe papa
deng mama pe nama
mar kore juga bekeng simore
apalagi yang bakore cewe vasung rambu pirang
itu depe kode burik pangge manyabung di utang-utang
mar kalo yang kore tanta gode batagi utang
memang langsung totorofe rupa muka babi utang
kalo laki bini baku kore
itu kode sasadiki somo bobou pondang
campur ikang garang
karna yang takore di tampa asang-asang
BODY BALIMBING BOTOL
asang kinoy
body balimbing botol
bagaya asoy
di mega mol
dia pikir masih dapalia bahenol
kacamata riben
baju longgres
hak tinggi pink
mar bitis weris
ini gaya nentau sapa yang waris
umur so nene
stel-stel kase pica kendis
o tuangngampung
tanta pulang jo ka kampung
pigi bakar tampurung
raho diri
jang tanah somo tambung
TANTA MANADO
tanta manado memang so nya lawang
bicara gaya enter cewe-cewe mar kalah
no nyanda mo vasung gaga bagaimana
dari kening sampe jumir dorang gurinda
pake baju picah balakang deng dada
pi orang kaweng so kalah-kalah nona
tanta manado memang taurus bae-bae punya
samua laki pe doi maso padia
barani laki putus karja
no trima ngoni depe muka pustema
befeto gila rupa nene dorinda
ORANG MANADO PE MODEL CALANA
orang manado memang modis
di jaman bendi pake calana jengki
di jaman elvis pake calana levis
kini jaman pis
calana so lebeh tipis
supaya gampang pipis
apalagi mo baku kikis deng baku tindis
orang manado memang modis
ada istilah calana tai yakis
gaya cirping di batas kumis-kumis
nae motor dari tikala ka karangria
panta tafia putih rupa biapong pia
kalo dia kuli itang
no bumbung rupa manggustan tujuh mata
ini tu calana bekeng gampang cilaka
karena samua orang suka mohaga
pas mata tatanang di sana
enter opa jatung di got gara-gara tu panta
Discussion about this post