TAGHUNALANG
Burung talrumisi dimoro su tataku
Maning papanu polisi ia tamataku
Burung kalrahono dimoro su tataku
Maning papanu hono ia tamataku
Burung bahoa dimoro su tataku
Maning papanu matoa ia tamataku
Burung kalriawo dimoro su tataku
Maning papanu gating balrawo ia tamataku
Burung lenggu dimoro su tataku
Maning papanu gatine mapegu ia tamataku
Burung tegi dimoro su tataku
Maning papanu malregi ia tamataku
Burung sinumpito dimoro su tataku
Maning papanu mukukito ia tamataku
Burung aheng dimoro sutataku
Maning papanu wirosableng ia tamataku
Burung su salrana tala dimoro
Su tempo ene ia mataku
I TATUNO NAUNGKU
I kuko poloku
I tatuno naungku
Gatinu matulrende
Polo dundangku
Kuko poloku mang sembau
Kapulu naungku maka mara lraude
Bawelo i leipi
Hebi i luipi
Nelambunang sunaung kadalrungange
Kehengang seng i kuko taghuang naung ii
Naungku gumenggang
Maeng sangiangku pai sumarau
I kuko taikasilo mata
Badangku temang mate
Maeng sihelo i kuko maghea
Duhiko temang mapilose
Tawe habare bou i kuko
Iha badangku temang nawawesu
Emihe kadio pia peninggene
Mengengkaung susentinia sumoho metiki
Utau kukerong mumelisang
Irungu menteko simbua
Bakude naungku naghaghoghahe
Tanakawuni kapulu naungku si kuko polo
Hebi ia takahumperongang
Naungku mekekelriwu mededea
Maing sukahumperongang
Arengu masaseba
Karimako ia su kalralruase
Sumirung su naung malrenehe matulrende
I kuko mamungkase naung
Naudipe pudereaku
Maning malriku runia kuko polo
Belengangku mang sikau
Kalrumbako i kadua maiang
Maiang sudimpulre pekakauhang
Sasae mamoto woba
Susakaeng singgesa pinekauhe
Samurine
Batangengu batangengku
I kadua
Mang sembau
Poloku
Kapulu naungku
KAKINDOA
Sutualage runia
Sukalralroahe kendagU
Suwowongu rarisikangku
Supelou kapiaNu
Susentinia sasinda ia hala
Alramate U tumolre
Kere kaghaghea dalrempangengku
Kere e kananandu tulrumangU
Sukatatoghase badangku
Timalrentu kuateU
Sukalralruase jiwaku
Naenede RohkeU
Supatiku apang ko ikasilo mata
KawasaNu nundiadi
Apawe lai daku i pubera
Kere kaselahe riadingU
Tawe apa daku ikaonggo
Badang jiwaku kebi supalredU
Tawe apa daku ikapatendang
Dalrohong runia kebi koaU
Elangu marosa ii ko isai sumataNu
TulrumangU nangilembo bou dalrawangku
Takako mataku bou senangu runia
Takaradeau sematang tualageU manata jiwaku
Takako tulriku baou katateleng u runia
Takaradeau sematang tingiheU daku pantuhukang
Takako mohongku bou pebisarang runia
Takaradeau sematang hengetangu daku ipulehabare
Hakideko limaku bou katiu runia
Takaradeau sematang kapuluNu daku koateng
Hapuseko bisiku bau pantuhu runia
Takaradeau dalrempangku sematang tumolre siKau
Tengalre aha sudalrengU
Koa tuhu kapuluNu
Inie naungku
Koa kere naungU makendage
Inie badang dang jiwaku
SupalredU ia manarakang
BIAHE SU DUNIA
Suhiwang gaghurang
Takonsang apa
Suhiwang sinti buhu
Seba nukakonsang
Makatahendung si gaghurang
Makakatahendung kapapiane
Makatahendung si sinti buhu
Makatahendung imbu kadio
Matatata sulrimang gaghurang
Lempang matatatape
Matatata sulrimang sinti buhu
Lempang musasahoso
Mutiki su palang gaghurang
Luipi su kobong firdaus
Mutiki su palang sinti buhu
Kobong firdaus luiping kela
Niimbu i gaghurang
Sinda menteko maudupe
Niimbu sinti buhu
Sinda lintu awi tanaatore
Imbu i gaghurang
Imbu su rehu imbu su pipi
Imbu i sinti buhu
Imbu su wiwihe imbu suapa lai
Laheku saruru i gaghurang
Badang malralrending
Laheku saruru i sinti buhu
Badang kadio simarinding
Mamile gaghurang pia untune
Mamile sinti buhu pia temange balrine
Menentang gaghurang makarosa
Menentang sinti buhu tamakatemang sedape rosa
Oh gaghurang
Oh sinti buhu
Oh tuang mangampung
Ia mupulu
PIRUA ANA SAMURI
Pirua ana samuri
Nihiking sususane
Sasuling tempong tamai
Suelo i labo mangalrene
Tempong nalriu susa supangangidope
Tempong ii susah sudalrumena
Tempong tamai naung sukatatape
Maning malrukade talanakapumeda
Su tempong ii sikolra mudalrahaghi
Sarang berang tau kebi matatintiro
Tatanatang gaghurang niweho pelo pai
Mubinsi maeng tentirong tintiro horo
Ana samuri titele mundalrengkang
Mubisara pia lau berang tau
Nikategung tumata magurang
Naung teruse nuhamau
Maeng su tempong luatorang
Gahi tawe nahatede
Duang kamohong si gaghurang
Lima ndepa nipusughalre
Ana samuri balrine taluatorang
Ana samuri nalriu kapapande
Kapapande nakailohang
Baugu tintiro masipi gesine
Pirua ana samuri
Susa mudalrahungge
Naung nusupa dahiri
Tanakakurung u batangenge
Maeng pia ko nangilembo dasi
Susungkitang paka nawo
Maeng batangeng naiang surasi
Tulri katataka bou laogho
I kami pira ana samuri
Naghea bou adate
Mapulu sau mebalri
I yakang tanupetode
Mapulu musasindae singka
Takaradeau matatape u batangeng
Koateng be kere apa
I yakang tanakaghanti si gaghurang
I kami pira ana samuri
Paringangko sutulride runia
Tategu ariwe ipubawuni
Sesile samuri makoa kia
Arie kawau mugeli sasasa
Alramate tatape ipesombang
Ruata mangkawasa
Manahimata apalrombong
Tategu maing kadodo makatulrung
Isulrung sasasa gahuwa nipakaremase
Mapiang kadio ko niotong
Isulrung su labo ketang nisahe
UMBASENG TUHASE BOU LAGHAENG
(labiti dingang iakang Dirno Kaghoo)
Ese pile bou Karangetang
Limempang sarang wenang
Nipoto puide su laghaeng
Nalrabo su wiwihe apeng
Mataku munondong sakaeng
Kawe makehage munalang pekeng
Maeng su gahi nanawo su irung
Maeng badange ia mudorong ampung
Singkae takaihang
Sarang badange niwentihang
Sutempo nalriu arenge dindong
Malrewehe kere kakilintong
Kela pia daghuse nilanisang
Maulri muhala kai mapinsang
Mebisara makatalrentu naung
Maeng pia wawine i kinaung
Emihe makararenting
Muhala welo kai mutumbiking
Maeng mubasa arie mundohang
Meng mundohang kai mailohang
Baugu bohe ii malralrending
Nilanging sutualage bituing
Arie nanandu mulandung
Tahang masempu subeke marendung
Maeng beke marendung seng mawembang
Umbaseng tuhase seng tamakalempang
PIA BEKE BOU PAMULANG
(karaloku si gaghurang Tommy Jacobus)
Timumpaeng i kalrendesang
Sulrimane bara binilang
Kukerong kere intang
Nakatialang haghi bihingang
Su kaihine teking Hengkeng U Naung
Tatialang kasasana naung
Mebawisara kere ruduhang
Sarang kinsulre ikaselungang
Arie kataku menego ulring
Su limane kebi malralrending
Su bininta pakaiangke su dolrong
Lumesabe su selihe kere tondong u tiolrong
Kalriomaneng kawawekise kere paporong
Si Umbo Lrangi pung u kebi dorong
Su wituing kebi tatialang
I matingguhukang tawe lumawang
Su raki arenge timeleng
Bengine nakoa tiwa su matateleng
Su wawohe ii ia mupatendang
Kerelagung aghide si gaghurang
Kapapilentese tawe i kasulrung
Makoa tiwa su ana pulung
TENTIROKO
(Karaloku si gaghurang Jupiter Makasangkil)
Tentiroko sia pusingkompeng museba arengu Mawu
Su sentinia pusingkamohong baweranu
Sasasa tatintiro maenede mupakaholo naung mamara
Tentiroko sia maogho arengu Mawu
Su pukekendung maraļung ia nasesa
Su kakanoau laaha mapapasiala
Tentiroko sia musambo u putatumbiahe
Takaradeau mariadi pudarame mateta bou batangengku
Su tagonggongu pukakendage nipetateleng
Tentiroko sia musalo u kaļaļunsemahe
Su pusung bara su ļimanu
Tihoise putatempangeng nakoa daļuase
Bekeko sia susa dang daļuase su aļungu ļangi ii
Su ghatinu kehiu kasasabare dingang teling u naung maghaghambare
Takaradeau pia katatoghase su lehe dang su temboku
Dumaļingara maogho su Mawu
Punggene putatumbiahe
2018
PUTATALREI
Tarimakase i hengke su koa U Marange
Namalriu wuwungang kakindoa nihengke
Pesasombang mapia
Su samurine tiwa
Pia beke tanikawera
Baugu dalruase nangilembo gaghua
Seng kerene su runia
Pia sombang pia talreine
Ipesombang sulralrengang
Ia tulrung kilralrai
Lumintu keng ia lumintu
Lumempang keng ia lumempang
Marau su mata
Arie wuhi su tanata
Maeng nutalrei kapia
Ia pesombang sau su elo mapia
PUISING KINA GARANG
Kuko poloku, sintaku, tatuno naungku
Mageng ikau pia temponu maing kadodo
Ontongko êgolre
Têhunge naungku
Bêdang pia paļang pêisee tanasueng sendenge
Arie bala mulênge manawo arau tandangeng aheng
Kuko poloku, sintaku, tatuno naungku
Mageng i kau bêdang pia naungu mapulu maholong sasi
Ia su apeng
Mahêdo sasi lumanabe
Musakaeng lumiu towoe manêntang tonggene
Munginsomahe anging bou doļong
Tuhue mamala i kadua nalangeng anging bou petone
Kuhate maingate sire mangalao
Balate punteng tutatêla sukinoang mundahiri si kadua
Ļaude mamowo sikadua
Masêmbau kere batang nunalangeng sêlihe sewowong bêntaļe
Kênang sau su’ su naungku
Sasuling sutempong bawêlo bêdang ene su tuļiku
Saiwe makêna nakale bungang su sundihang baļe sau tumuwo
Mupakawêngi naung naļiu napene katataku, binsi dang tanude
Kuko polo, sintaku, tatuno naungku
Kênang sau suka kêtu tukade naungku
Ene kangianengu bêdang pai see
2018
KAKILITO
Apawe ikaaļa mangaļene
Pai su kotou engi
Darua lenggu nusesimpaļe enggu
Su hebi maļaļung
Isaiwe munggaļa matangelo
Pai sene pia buļang
Hengkung singkodo tualage’e
Makoa la’utu dumaki lawesang
Mesasasenggo kebi pia apeng pamunakenge
Pubawiahe ii napene u bawera
Berang sasasa pinintung lai sasambo
Naantehe su sela’eng nangintarora su daļempangeng
Nusasahese nukakai nakoa dorong
Biahe ii takere kimese luminso
Su simpalang singkaļendiu seng su bongkone marange
Kere singkatau nawembang
Naung ta’ikaparate pile ta’ikatantu
Dudarisi su daļeng nulenga
Taweapa tatialane
Kehiu pubawiahe ta’ikapatehe su pandoļu tondongu mata
Apa sarung ipesombang
Ta’ikaseghipo su tualagu orase ii
Katatuļase ta’ikasilo mata
Pai su tampa ene matatana
Su kadera wuļaeng su wukungu naung
Tingkahe tingkalabe tukadu naung
Maeng mapuko dairelo
Hengke tingihu tuhukeng saļai
Kinsomahe matangelo
Dui dalo su Koau Marange
Su Tataghuang banggilu dorong
Su sentinia kaļepangu tualage senangu matangelo
Sene pia u Kaļaļunsemahe
2018
Discussion about this post