TULUDE
Karya: Iverdixon Tinungki
su hiwang lawesang taung tutondo
nanentang bĕke apang nunangihoro
hundugu kaliomaneng nanahulĕnding
nitaking suelo simbotongang dimoro
bou tempong ampuang tuᶅudĕ manulidĕ
mamuka kaᶅimbuhungang makoa dalĕnding
su ngalo dasi dimarisi apangu matĕling
manasau sinasa bau sasasau masusi
ndai supung pakele susinda orase
maᶅukade mahĕbi mang lempangeng kĕbi
lawe bawĕntale mĕnawuhe wau
uwusĕ sĕmbau kĕtang bou Yamang su ᶅangi
ho ĕlo sihĕlo taikatika
tutuwo malukade kalongene naᶅĕka
kere daukalu nanawo niwembang anging
Sai makatika sasampelene suapa
runia taikaĕna kere sakaeng naenede
toghase wadang tamakauᶅing petone
tuᶅudĕ susi kĕtang bou Mawu Masusi
nanualage naung mengaha pamunakeng
SASALAMATEU PESASOMBANGENG
Karya: Iverdixon Tinungki
limintu pantuhu
lumempang somahe
mamuka saᶅuhe
mĕnahuᶅĕnding bawera
pehadĕ su wuᶅude
asinge sutaghaᶅoange
natĕhi su marenge
nitaking Masusine
dimenta bou marau
nanawuhe bengi
nusa kinawantelang
naᶅamude sangi
saᶅamate amang
saᶅamate inang
ndai kaiang
ndai Kaiang suhiwang Ghenggona
su singgatang kakendagu Hapi Mapia
ene pĕsasombangeng
ene apangu nawembang
simenang simarang
su ĕlo kukero
ĕlo mapia su lenehe naung
nitaingu Masusi susasĕmbua wera
ndai wera
daᶅai kanawo
mapia kadeho
bou daraselangi upung
tĕdeko putung
tĕdeko naung
BIAHE
Karya: Iverdixon Tinungki
nighaᶅa boau sasasa
nasasa nakoa sinasa
nituwo suᶅimang maᶅaᶅĕnding
natamang sunaung masusi
tumuwo marange nakasĕnang kapapia
natamang maᶅaluhe nanaᶅĕnding banua
bau aᶅungu binawa malolong su langi
bau hamu sarang towoe dasi nakoa bengi
TATEI KAPAPIA
Karya: Iverdixon Tinungki
ndai huso, ndai lawesang
ndai apeng pia dingkaᶅeng
mĕnalang marimbolongang pia tampane
maᶅupa mĕsahingtandung arikawuᶅe ᶅoᶅong
dingkaᶅeng idatu nanawuhĕ bio
Suᶅaᶅeng marau banuang mang taikasuᶅung
huso lawesang nitutiu anging
ingang suwadang penanahuᶅĕnding doᶅong
bou kadio
bou kadio ake sangiang nireno
gampa limangu lulenda su manuru
mawĕngi kere lanisangu masusi
pinanaᶅuhĕ tatuwong
pĕtatei kapapia
daᶅengke polo
saka wuᶅude
tatempangeng ᶅangi
lempangeng ᶅaude
simbuᶅe tamaᶅaᶅĕsa
arikaᶅĕsa naung mapia
BERANG TATAHENDUNGANG 1
Karya: Iverdixon Tinungki
suaᶅung binawa
kĕbi tamakagaᶅa ᶅangi
bou hamu lelang mĕdaukalu
bou kapai tatĕhi maᶅoᶅong
apang nĕdaukalu pia koto pia banggile
nasĕpu marondose orase mangkadaᶅeng
limente ngalo pai ᶅaudĕ makaᶅĕkabĕ
uᶅing sasasa ᶅawesang ikasĕbangeng
ndai…
ndai sombo amang inang
sombo susingkasombo
sirung susingkasirung
bou hamu lelang mĕdaukalu
bou kapai tatĕhi maᶅoᶅong
BERANG TATAHENDUNGAN 2
Karya: Iverdixon Tinungki
mangoto daukalu
pĕdorong su maᶅaᶅĕnding
kĕbi kotutuwo
pia datu nuhiking
tuwoko katamang
katuwo katamang
uwusĕ tumuwo
taikaposo anging
bau tanah sarang binawa
kĕbi maᶅoᶅong su masusi
supaᶅede masusi
kotutuwo mughĕsi
dasi
dasi imarange nanahuhampa kalu
kalu mapia lĕhasene maketi
toghasĕ bou imasusi nupuhĕngking badang
ndai panuwang
tuwang banggile ᶅĕka kotone
batange sakaeng, lelange baᶅang
katagoghasĕ naung, rinda tatondone
Discussion about this post