Karya: Iverdixon Tinungki
SOLITAIRE in CEREME
di dunya ini
cuma ada satu cinta
deng cuma satu kali mo baku dapa
entah dalam nikah atau cuma baku haga
yang pasti, itu yang paling torang inga
yang selalu bekeng torang bahagia
entah deng tawa atau deng aermata
dari waktu muda sampe so oma opa
di dunya ini
banyak hal memang susah mo rumus deng kata-kata
cuma boleh takser deng rasa atau deng cara basapudada
satu saat kalo kitorang sadar ternyata sore itu
so oranye depe warna, itu tanda kitorang so tua
kitorang mulai lupa nama deng tampa
dimana torang pernah manangis atau tatawa
cuma cinta yang salalu torang nya lupa
dimana pertama kitorang baku dapa
deng rupa apa depe rasa pertama kali baku haga
entah di sekolah, di jalang, atau di tampa yang ta inga-inga
samua kitorang memang punya cerita
sandiri atau berdua
tentang cinta, tentang jalang vor datang
juga vor pulang baku dapa deng dia
karna di dunya ini
cuma ada satu yang paling ajaib
cinta!
BICARA MANTAN
bicara mantan sama deng momasa santang
lebeh lama lebe picah depe minya
apalagi kalo umur masih magori mayang
depe manis bekeng rasa suka babale ulang
mar kalu cinta cuma panas-panas tai ayang
enter gofela tau tu arti mo isi gargantang
jangan harap mantan babale haga kong sayang
ngana petaiminya so bekeng dia muntah kasiang
mar lebe bae jang bicara mantan
kalo ngana pe hidop lapungu ndak karuan
kasiangte dorang mohaga
dapa rasa rupa panah tatikang di dada deng taripang
MACHO MACHICO
cowo manado memang macho
mar bukang sadiki status jomblo
kalo malas tacampur biongo
biar vasung mana cewe suka mobatengo
cewe manado memang machico
mar kalo ngana badekat cuma deng modal solop swalo
sampe pongo jang harap ngana modapa dorang pelombo
dari malalayang sampe sindulang
macho deng machico taambor-rambor rupa ikang garang
mar ngoni jang sambarang gate kalo dia so orang pe barang
tasalah mata kalo bukang bibir pica, pasti testa bangka
so ini tu manado pe gaya
bae deng jaha susah mo kase beda
jang ngoni garta angka peda
dong dusu deng tamako gagang satu depa
LAWER MUKA GAGAH
paka-paka gaba-gaba
jang salah paka orang pe pala-pala
dulu di jaman baehula
kurang goraka kase baku dapa cinta
sekarang jaman so beda
angka hape langsung bacarita
mar jang kira nona so suka pangana
kalo lawer biar muka gagah
enter gofela bapikir mobatera
so itu nyong kremos lebeh laku
karna dia tahu ni hidop pemalimbuku
karja karas sampe tawiu-wiu
mar isi dompet bumbung merah biru
GARA GARA BAHASA TABUBALE
bicara manado tulen
so ua paling span en keren
memang stengah ogob
mar ua pe nyali paling beken
sapa ndak kanal pa ua anak sabla aer
jago bahasa manado dari cubiraka sampe hibop
bahasa tabubale so ua yang paling top
saribu aid bilang ubiras
pi tidor aid bilang pi rodit
mo pulang aid bilang mo ngalup
mo ba gate aid bilang mo ba etag
babi aid bilang ibab
sebe aid bilang ebes
cuma ibu dia nemau bilang ubi
soalnya pernah enci lucy cigi-cigi
gara-gara dia ba baca; ini ubi budi
satu kali ua jatuh cinta
dia ser nona vasung kampong cina
maya cia karenina
kancingan cina borgo arab minahasa
no ngoni bayangkan jo depe vasung bagaimana
kalo nyanda rupa sinderela jang bilang kita
mar bukang ua kalau nyanda nekat
dia kira cinta sambarang tada
hidop lawer rupa gorela
mo suka nona muka sinderela
kasiang badang bongko mamaruga
mar ua bagaya stel binaraga
dia kira boleh garta maya pe papa
raja kontao di antero ampa lima
pas sampe pa maya pe pintu rumah
maya pe papa dola kong haga stengah marah
ua pe dada langsung barasa somo tacabu nyawa
ua babale kong tumingkas rupa setang kanal goraka
mar cinta so di testa
ngoni kira ua mo menyerah
depe eso ua ba bale ulang
pe mujur apa maya yang buka pintu rumah
ua pe dada langsung rasa babunga-bunga
persetang deng sgala tatakrama
ua langsung tembak deng bahasa tafuraga
“ayam atik akus pa ente yam!”
sondor manyao, maya lap ua pe mulu
jangankan ua pe cinta
enter ua pe bibir langsung pica kong bangka
so ini tu ua pe tasoe gaga
gara-gara suka kase tabobale kata
akhirnya gigi amper patah
KALO INGA CEWE LAMA
kalo inga cewe lama
pasti inga gofela
karena tampa baku dapa
di pinggir sabuah soma
maklum blum ada mall deng pup
jadi di paserpaser so rasa sadap
“ojo Po,” Sindulang bilang.
kadang baku dapa di pesta katrili deng volka
rupa kisah putri salju deng sinderella
badansa sampe so pokapoka
kalo inga cewe lama
pasti inga kacang deng pisang
itu camucamu kalu bagadang di rumah
pas tvri siaran dunia dalam berita
capat ba angka
jang mamantu sirang deng aer rica
Discussion about this post