Memang nya gampang batulis puisi deng bahasa Manado. Depe kesulitan pertama karna bahasa Manado ndak lazim dipake batulis sastra. Deng baru sediki upaya para pesastra batulis karya sastra pake bahasa yang depe asal dari bahasa Melayu, deng sarat pengaruh kolonialisme ini. Apalagile bahasa Manado depe dialek memang khas en madodo.
Padepe sejarah dari taong pakahia, bahasa Manado cuma jaga pake di pasar-pasar oleh para pedagang saat bajual deng babli (transaksi) di sekitar bendar atau pelabuhan laut Manado. Dari situ kong bartumbuh jadi kitorang orang Manado pe bahasa sehari-hari. Depe perkembangan kemudian, bahasa Manado diperkaya deng berbagai kata-kata serapan yang depe asal dari bahasa asing antaranya Portugis, Belanda, Spanyol, Prancis, Inggris, Arab dan bahasa asing laeng. Kong jadi lebe gumu juga deng bahasa daerah sekitarnya.
Di sisi laeng, batulis puisi bukang cuma sekadar batulis tulisan talemburang nya karuang yang nya depe nyawa, nya pake ontak. Karna kiapa? Kehadiran puisi depe ujung-ujung adalah kehadiran bahasa deng kehadiran realitas atau kenyataan di kitorang pe masyarakat. Karna batulis puisi adalah seni olah bahasa yang ada muatan gagasan deng pemikiran. Batulis puisi so pasti adalah upaya mocari model deng karakteristik dari sebuah kenderungan estetik, atau orang sablah aer (Manado Utara) bilang mocari depe “moning” alias indah, sadap kong baisi.
No bagaimana dang itu model deng karakteristik puisi kalo pake bahasa Manado? Pende cirita, ngoni nikmati jo puisi karya-karya Iverdixon Tinungki di bawah ini.
MANADO MOOI
manado memang mooi
banya tampa indehoy
dari kantor sampe loby
semua bicara urusan gidi-gidi
manado memang mooi
anak muda suka yang assoy
nyanda pikir sana-sini
akhirnya kurang kaweng konvoi
manado memang mooi
soal gaya deng urus diri
karena hidop belum mampu mandiri
laste jadi papancuri
manado memang mooi
banya politisi rupa kurcaci
puji sana puji sini
biar ndak doi mimpi jadi walikota atau bupati
manado memang mooi
depe pengusaha rupa bivi
sogok sana sogok sini
akhirnya karja proyek rugi
manado memang mooi
bini sasadiki lapor polisi
karena laki pukul deng besi
gara-gara dia so kalah maeng judi
ini puisi juga mooi
depe besae rupa muka tikus mati
puisi manado memang bagini
pake bahasa pasar jengki
POTAS, POLITIK TAI SAPI
anak tuminting ada istilah potas
politik tai sapi anak kampung stengah waras
biar doi cuma ubiras
mar bapake kalah-kalah anak pejabat teras
skarang potas so nae kalas
biar kurang mo jual barang bakas
bapaksa bacalon for mo rasa pake jas
abis pemilu rumah tanah samua amblas
miskin so reno tinggal ampas-ampas
untung bini ndak orang rampas
bagini gila kong ron-ron kombos sampe liwas
POLOTIK BEKENG GILA
polotik memang bekeng banya orang jadi gila
biar ontak tuturuga suka jadi bupati atau walikota
dasar modal cuma mulu rica deng tai mata
enter jadi calon ndak ada partai mo haga
ada partai kase calon modal vasung gaga
sedang tapilih nentau mo bekeng apa
karja cuma raba-raba akhirnya maso panjara
karna bawahan so kase cilaka
adaleh tu manusia kapista nentau bicara
maso polotik vor jadi pejabat negara
lima taong wowo sambunyi kapala rupa tuturuga
mar studi banding ka mana-mana cuma mo cari doi balanja
ini kasta-kasta bagus iko sama deng jaman jepang balanda
ika di pohong banyak laga deng bivi merah
supaya dorang tau bagaimana rayat pe menderita deng sengsara
jang ngoni kurang ja ambor tai gigi deng setang sagala rupa
JANJI KONGA
ada satu Manado pe payah
suka bajanji mar janji konga
cirita so sampe di Klabat pe testa
ujungujung konga samua
ini sebenarnya kalakuang jaman parmesta
pukul carita deng janji-janji sagala rupa
enter ayang so kincing tu janji tara mo dapa
soal ba konga miskin deng kaya nya depe beda
apalagi politisi pe carita
manis di bibir, mar lida tulang sasaja
barani ngoni parcaya “kasiang pirua”
so di situ no ngoni taboto gaga
POLOTIK GAYA BEBE
masih pagi Neles dapa lia so weles
waktu kampanye Neles fressko en neces
Anes bilang maklum; “dia kwa tim sukses”
di mana calon pigi, di situ Neles pigi
di mana calon basinggah, di situ Neles basinggah
saat calon kalah, Neles pe semangat trus patah
rupah tusa jatuh di tai minya
Anes bilang maklum;
“polotik gaya bebe mana mo dapa suara
tim sukses cuma iko-iko calon pe panta”
laste tangangah-ngangah
di tps nya ada suara
POLOTIK GRAP-GRAP
orang manado bilang
polotik bukang polo kong ketik
kalo polo kong ketik
bekeng puru si polo dapa lia antik
mar polotik memang ada hubungan
deng polo kong ketik
cuma batas polo-polo kong gelitik-gelitik
ini tu manado pe gaya ba polotik
depe intrik cuma rupa kolotidi kanal listrik
polotik dulu memang beda deng polotik skarang
polotik dulu polo deng banya taktik
polotik skarang cuma polo kong bise somo lantik
abis pilwako samua mulai basambunyi rupa kodo
manggoro di lobang ba pangge ujang
datang banjer samua kaluar bajejer-jejer
minta sumbangan deng ember-ember
kasiang kandidat yang lante
masih baku dapa deng tanta tante
yang tanta so nda farek mo bakugepe
yang tante babale muka deng gaya onde-onde
polotik memang bekeng totorofe kalo ta soe
kalu ta sua bekeng simore
pas menjabat langsung totofore
kalo kpk kurang ja kore-kore
ini puisileh rupa mulu pante
polotik kurang da bale-bale
rupa panta so tarabe
punung deng setang putar pe putar bale
KASKADO
cuka minya
kaskado ngana memang banya tai minya
waktu jadi pejabat dari tanah sampe umur
samua ngana gusur kase maso liang kubur
biar so tua
banya calana masih ngana lucur
apa ngana pikir panta rupa pintu atou jandela
buka tutu iko ngana pesuka
kalo bicara ngana rupa dewa
mar ngana pe burung kakatua nda pake mata
ta salah langkah orang pe bini boleh cilaka
kaskado ngana memang bajingan
soal bajanji nyanda depe lawang
mo tunggu musti sadia umur panjang
bicara gorela, so ngana tu gorela pe nenek moyang
proyek apa yang nyanda ngana makang
enter yang siluman bekeng ngana kanyang
kaskado…kaskado
ngana memang baline gampang?
KALO MO IBARAT
kolo mo ibarat ini pencitraan
samua masalah beso rupa somo tamat
ternyata ini rayat depe hidop lebe hari lebe melarat
yang sanang cuma setang konglomerat
deng depe anak kerabat
gila memang ini pencitraan
ibarat ambor luda pa rayat pe muka
mo marah ibarat suara ta tutu deng toa pe citra
di mana-mana muncul huru-hara
dari pana wayer sampe perkosa baku bakar rumah
ini pencitraan so ibarat dosa
pemimpin gorela mana rayat mo rasa basudara
ini daerah ibarat dongeng para raksasa
pemimpin suka rayat puja-puja
babantu orang vor cuma dapa publikasi media
di hati dia ndak peduli lebe hari rayat lebe cilaka
mo ibarat apaleh kasiang ni torang pe dunya
kurang mo manangis kong paka-paka testa
TAI MINYA
di karangria,
waktu pae jadi bos pabrik minya kalapa
tai minya tong ja ambe vor pake momasa
tapi jaman so barobah
enter minya tanah so ganti deng gas
pabrik minya kalapa so kurang besi bakas
tai minya so pindah ke gedung-gedung berkelas
dari jakarta sampe miangas
so jadi tai minya pe markas
orang manado memang paling karas
urusan tai minya deng baku gas
baku cungkel sampe samua jadi ampas
apalagi politisi pe gaya
enter pandeta dong suruh cuci depe kaki
dasar ontak sambiki
hal-hal suci dorang so kabiri-kabiri
no bagaimana urusan doi nyanda korupsi
pas bangung pagi so bapikir minya pe tai
kasiang skali rayat pe nasib
salah sadiki tembak di kaki
yang korupsi pe banya skali
dong kase biar pake dasi
ini cirita memang
tai minya pe tai
Discussion about this post