SINASA
Maning biahe nutawide kere u pidu panada
Su ļimang i Timade Tahalanting Biahe
Pidune nau makoa rendane
Tumatengo elo kadentane
Baļine kere manepa ongole
Su lila masikome
Nielu tanae maļowo
I suļung kere kukise gepe
Nihunsake si timade hono
Mubiahe mambeng pakatote
Musaļa sepa masusu su ļongi
Uade lila ko takoae duhine
Baugu kueku untie baļine kina
Maeng taumata kebi pia tuļine
Kumbahang areng mawota baugu ļinga
Bahundake sedapene ko su mohonge
Maļana-ļana dampane matemang-temang
Mohong maļana pia semengkenge
Tuļung arie pake pubaramohong
Bubengka napene lehine
Manemang mang mangaļa pinggire
Mubiahe pupake pendiriange
Ariwe iwembang kere palinggire
Manimbe naung seng napeho
Gati mang tatape pakapupure
Emihe kere bawoko
Barote timuwo takoae ragine
Dodoļe maļana
Nikoa tamong banua
Maeng pia nipusesaļa
Gelire ampunge pirua
Tatanatang i timade pia pistolene
Pumpengedoko mutimbukang
Makai su daļendehang
Tedu su ļaede nupanggulu su naung tuhue su kengkung
Pakarau hombang
Pakapantang tinggoļang
Pakanandu mangena
Pakatiti tohema
Tahendunge
Pakarani su Tataghuang
2018
KEBI BOU NAUNG
Taļunge matane
Taļunge tuļine
Taļunge lilane
Taļunge limane
Taļunge laede
Takaradeau masingka
Mutehung apang ko mapia
Muderingihe apang ko mapia
Mubawisara barang mapia
Mukoau barang mapia
Lumempang su daļeng mapia
Su winohe susi pia tinena imeteling
Naung tuļung pakariagate
Baugu bou daļung u naung
Tumendang senang u putatumbiahe
Naung mambeng pakariagate
Uļingang naung mapia dang matene
Biahe masuku aļamate
Batu’u Ghenggona tumandihu putatumbiahe
Naung mesuļungu mepude
Kakindoa petuwone
Su kakindoa daļohong naung pasi pakatene
Mepude petuwo mambeng pesumaļe
Riahine biahe su kaļaļunsemahe
2018
SAUKO IKADUA MUSAMPERE
Sauko ikadua musampere
Musuling daļohong naung mukekendung
Tempong ia bedang kadio
Sauko ikadua musampere
Mugantare tempong daki
Anging maļenehe kere paļedu
Masikome dang maļaļending
Manapu temboku manengaļe bembangku
Tempong ia bedang kadio
Sauko ikadua musampere
Musambo suruduhang
Matemude lai maudupe
Maudupe manata sisia
Matemude mangaha ia lumempang
Tempong ia bedang kadio
Sauko ikadua musampere
Megiong kasuhampa kalu putatumbiahe
Kalung putatumbiahe wadangku sorong orase ii
Kasuhampa kaļaumure batangengku
Nisuang su kakindoa iinang iamangku
Timuwo nebura sukaļiomaneng igaghurangku
Nubaļembeng tempong tamai
Tempong ia bedang kadio
Sauko ikadua musampere
Musampere kaļaļuase naung
Kaļaļuase mutehendung tempong nipudaļiu
Tempong pubawiahe seng tamai napehong
Nenawuhe bengi nanentang tiwa
Kere biang mahedo pubaruntungang
Sauko ikadua musampere
Manahola lembeng putatumbiahe seng nikare Imarange
Pira taung pirangelo arau pirangkaorase
Dakalung kaļaļuase ariwe maļekabe
Namuhe aļamate maenede sorong tempone naketa
Kere su hiwang maļaļending
Naung matatape
Biahe sukaļaļunsemahe
Su tempong ia bedang kadio
Kalu seng nilanging
Pato seng timondo
Abe kataku kahumperongang
Kaļanabeng dudendingang Mawu
Su hiwang Ighenggona
Mekonsang we apa su paļedu Ruata
Pubawiahe nitaking Imasusi
Sauko ikadua musampere
2018
MANGALRENG BIAHE
Sarung mudating tempone
Biahe mambeng pia tataghupiane
Tataghupiane makoa diaga
Panalring dolrong kakanoa
Dolrong kakanoa sutatulrende
Dolrong kakanoa tawelengane
Kere kanganguda seng tamasulre
Biahelaing mang ketaengsensulre
Bulrang taung mudalriu
Singkondamata umure tumiu
Maeng manentang tiwa mapia
Nau tataghupia pelo pakapia
Biahe mang sensulre
Samurine mambeng pia mangalrene
Ariwe nairi mawihua taapa mangalrene
NASAHAMPI
Pubawiahe isulrung sudumalrengang
Dalreng pia iralreng
Lengang pia ilengang
Suwembang ipepikulrang
Rena kukarenane behae kukapendangeng
Binitang simarang natei su pusige
Natumang suwadang naningkase pisi
Namungkewoso liaghang tatuhu
Tawe apa ikakumpaede
Sigesa mapehong mubihing sau ipesombang
Apa wue daku ikapulu
Maeng balrine tatahulndeing?
Masahampi supusasirungang
Sukoa UMarange ia matulrende
PANGUMBALERANG
Kere nusenggo su lraudu sangi
Niterehu akeu mata
Marau tanikependangeng
Anging dumuhung tiu tutiu
Badang supendang kimeko nahingki
Susentinia tempo kintangateng silaka
Kapalrusang ongose seinsomaheng suwusuwu
Naung mutawakalri
Kalriomaneng nudaukalu sukoto usenggo
Malrumbako mapua su lrenehe
Maemping su anging silaka
Tuhue mawalrango su tulrumang
Mawuna eng su tintanude
SuhiwaNu ia nasahampi
SU LIMANU ISARAKANG
Inie kai endumang balage seng napato su kapapalru sang elo hebi
Matatata kere iGhenggona nangintanude kapalre iNoake
Tawe potoe tulrumangE su woba mededaung patiku udalrai
Su weda uwelade su wongkongu wentalre pato lohone mang alramate
Ulringang sasasa imagurang tataghulrihine kakindoa
Bou nusang kanganguda nau kapalre seng nubua
Taapa sesile pupantuhukang kai dalrengu Ruata
Maeng iKristus seng neliwusalra tuhue seng taapa salra
Lumente sasi suwongkong daghe abe kumbalang malrenehe
Singkianu selihe nubalri pato limengkade naung nukonsang belade kai gaghuwa
Sahemang pakatimbang tahendungko tatondong pato su wowong ilade
Alramate mang suwatangeng kakunsie su daroa tuhue dalruase pupepehia
Supato singgesa naung masulrung keng upulrangeng
Pulrangeng nahia kapulune makapesalra taghulrihine
Maning pia bawinae tulrung pusasulreng kapia koa tinena taumata matetelang
Mudalrahiking mambeng pakararame baugu kanganguda seng tamasulre
Karalo iketing makoa daralo bawa lumente woba
Su sentinia alramate daralo nipedaukalu nebura baneha untung
Kapapiang iUmbolrangi su taghalroang mang manahimata
Hengetang uRuata takatompolrang Mawu mang pung utulrumang
Lima pakaroka susa sigesa bawa hengkung su kalriomaneng
Su lrimaNu pato iserakang taung bulrang kadentane
Mawu pung usalramate tulrumangE tawe maheso tahiti ore lai pedisang
Mamoba tamaliwire bou suwusuwu su pamunakeng dianding Mawu pato matulrende
SU KOPIKU BINITANG NAWUNAHO
Ia tamakatompolre
Singkateta mengkeng tempong nitentangu
Susentinia bawelo
Ketang mangop imakalriwuhe naungku
Kamageng tamamaisu kopi
Badangku mutingkararung
Tamakawera mamanda kapapalrusangu elo
Kere lai sukapapalrusangu
Ia tanakategu
Ia tamakatumpaede
KOPI NUTINGKATEHI SU PANINGGENU
Makatahendung tanatang itahawera
Uadeko kerii;
Sadiai kopi sumalraotong
Onggo sarakang naung si masatia
Ta daku nisahi ahi kopi nawongkong su galaseku
Niwala pukena dingang kapuluku musombang dingangu
Dending desembere nikoaku gaghantinu
I kau mang daku ikapulu sarang ketau singongoku
Kenang bungkewoso kasasesa naung su berang alruse
Pegu ukopi nutingkatehi supaninggenu
DIANDINU
Ia saununggolang kopi singgelase
Isulrung su diandinu
Kopi nangilembong pia tengadenge
MAPULU MUSOMBANG DINGANGU
Tawe ikatika umure daukalu nitiu anging
Nanawo su tana nakapetuwo putatulrung
Mageng kasasesa seng nebura kendu
Sasirita nulelang su lelaharape
Su winawa nudarelang ia namohang
Marondosang nutahiti nulungkung kendu
Pai suhiwu timendang apangko tanisasirita
Suanging lagung kendung daku niwowo
Pia pendang bedang daku nipubawuni
Tanilelahabare sarang o rase nawawelo
Mengkeng dungkeng kangere
Ia mapulupulu musombang dingangu
Discussion about this post