oleh

Puisi-puisi Bahasa Sangihe Jolly Horonis (Bagian 5)

KARANGETANG

Pai marau su tondongu mata
Kara matei tipune kekale
Luenggunang binawa

Isai mapulu kumaiang su marange
Kumakurung siau
Banggile kara kinaļenda

Ļaude kinatana
Bou wenange nawiru natundu ļangi
Su naung kadaļungange nikekarima
Nusang kara su kokou Ruata

Daki ndai tiu
Daki ndai tiu
Bawa ndai
Bawa ndai benging patuku
Nighapa su tanggihe i Mawendo
Su intoļang Aditinggi kinaruru
Bengine aļamate su siau

TAMATA

Mamanda Tamata
Ginumemi sukadima
Bou wembang i kara
Anging aļuse namowo
Kinakoa uwuse pekakarimang
Siau su endumang

Putunge kinapate
Bongkone susi
Bou pusunge kinesawuhe tahuļending

Ta apa sesile si Yohana
Bongkong bunu sahidi
Yohanese kinapeta

Su pekakendung i Yohana
Naenede aļamate
Su pekakarimang i Yohanese
Berkate kinarindose

I redua maintoļang su siau
Tahuļendinge simbanua
SASAILI BOU KINOGHAHENG

Antibe niapareso kehage
Abe kapaļidang kasasusa

Su ansede nisasuang su omaneng nipasombo
Pai sene harape nakindoa
Liagha netatudo
Bou ļangi naenede keng aļamate

Saka simaka mangangansede
Wedae desungang tengkuhe sakang
Paporonge paporong katatuļase
Bou pusige sorong tana tahuļundinge napatiku
Lawuhange lawuhang mahoro
Homane kasasabare

Sasaili tamasili ketaeng daringihang su kulili
Sematang giong karalo ipararisi su wulurang
Nipatei nanubung ļangi susi

Daļuaļeng nanentang lena su wembang i magurang
Kehine lawage naghesere upedisang
Su pubawungkune sasailine kaļiomaneng

Su pusasaghang matangelo kinawawelo
Su anging bawelo saghede kinatiu
Naghengging sorong ļangi
Namuka tukadu naung iMakendage
Su ļengehu tana i mangansede kinasade
Nisarurune benging utana

Dairelo karumaheng
Su elo kadentane
Bou ene tumuwo barakate

HABARE SU TONGGENE

Pia habare nibawawa timuhe
Su ļaude mesasenggo kinaonode
Patone kinawala nunalangeng anging
Kebi kinagheming

Pia habare nibawawa timuhe
Su anging nipedisang kinawawa
Su tonggeng kendung niapahedo
Naung kinasesa

Hiabe kinewawelo anginge mamara
Timiu masikome
Su ļaudu matanu nipaposo
Simampele su petuku
Narondose nakoa sasasa

Bou patiku maļaļending ipi nipatowo
Nisombo su kaļaļuase su kanandu elo
Niondo akeu mata satia
Su tonggeg karimang masasaruru

SASASA KAPAĻE NOAKE

Singkatempo ļaude nugio
Lua nugaghulung sebune niterehu anging
Su ļaude maļoang sasi kinawira

Dala su ļuļunge su wiwihu apeng
Gunde nipusaļai
Lagunge lagung duruhang

Anging timiu ndai bou ļaude
Timetaļe su apeng
Tentinge dasi su wulurang

Sinumpito nusaļai
Lagunge lagung sasahola
Nakahengkung gebalageng

Si tahasahiu aļa bahanine
Si tahaļanging aļa dariahine

Kinesuļung su pamo
Naung kumbahang isegane
Pakaļe su ļaļunge
Pakaļe lai bou ļikude
Inie sasasa kapaļe i Noake

SINGKATEMPO SU MAHORO

Pung u ļangi nawuļaeng
Enene kimerong intang
Su sebung ļua kinaļema

Apenge matuļende
Husone sabare kinatei
Pubawihingang tatumbiahe

Ļaude’e kinahuntikilang
Ļuae kinahumperongang
Niwowo hiwang tatuļiang

Su tempong tamai naļiu
Ruduhang mesasenggo duļente
Su wowong daghe
Nakapegio sasi nakarame ļaude

Dala apeng
Dala apeng
Dala apeng kinawantelang
Tapile tawe pilene

Lawesange masatia
Dentang pinetarima
Itentang nelambae

Lawesange ļangi susi
Nitentang marau
Mubaļi mang su hiwang Duata

BEKENG SINGKATAU MASASABARE

Ndai lua gulung mugaghulung
Napesu su ising saghe
Lendene dala su wiwihu apeng
Sebune nitaterehu pubawatang selihe
Naonode nanentang tonggene

Pia singkatau dudarisi
Darisikange mohongu lawesang
Naunge matuļende
Nisarurune benging u sasi
Darurung pung u pebawiaheng
Nakindoa susasindakenge

Pamo kawawaļango
Londe kaļahangke
Dampare maļaļehe
Tawe apa isesasungutang
Kaļaļuase bawa madaļung su wenangu naunge

Kaļaļenehe natiala su matane
Kendage i Marange
Bou rarisikange natundu pungu ļangi
Kawasang Mawu napatiku
Su naung kinaendung
I Ghenggona tahasahiu

DIADINU KINAHERANG

Su wanggilu daki binitang mawunaho
Simenda natualage bou pung u malelo
Mawae su dadakele
Sumeda su pung u wahe

Su ansede sinuang kinasuhampa
Simombo niapatuwo marondosang bou ļangi
Aļamate kinatentung

Elo pinatualage
Hebi kinarendung
Elo pia binitange
Hebi pia mendauļune
Su kawasaNu kaļaadile
Dasi marange bituing kimerong intang
Kebi diadiNu

Bukung u pangangimang kinapekuhe
Su pahesu masusi
Su koau marange
Kawasang ļangi lai runia

UWUSU SILAKA
(su pananentangu tambaru)

Ooh Duata
Ooh Ghenggona
Dalo itumang
Semba ihengke
Karima dorong napusige
Susa kapaļuse
Silaka kaļiu
Hombang taipesombang
Pusasaļa ilelaampung
Dosang kinaghea

Ooh Duata
Ooh Ghenggona
Su ļaude su ļuļunge
Su katatualage su kararendung
Kawasanu patiku
Sumasimbahe kebi dorong
Bawera ini itetaghawera

Ooh Duata
Ooh Ghenggona
Maniļeda hombang sasaļuka
Medalo su senangu masusi
Nupatede baļiung ļonsong
Nedaļahengke bara i upung
Tagonggong nedarelu
Saļai pia banehane

Ooh Duata
Ooh Ghenggona
Palunge palungeko wadang jiwaku
Liung haghing sasaļuka
Su tireda matatape
Hombang kinaupu su kawasanu

Ooh i Upung su puengu Menongkati
Ooh i Upung su puengu Malelo
Ooh i Upung matatana su Buļawa
Ooh i Upung matatana su Dadakele
Ooh Duatang Ļangi
Ooh Ghenggona Ļangi

MEBUAE SU KAĻIOMANENG

Bou lawesang pato seng ipebua
Anging kinapiae ongose kinatuļende
Saki pia nabine
Sahinda pia malaekatene
Dorong iredorong
Gahagho ipegahagho
Suļeing tataļentu
Baļikeng naung mapia
Gelire kaļaumbure
Gelike kararaļuhe
Paļede paļede maļaļending

Inie pato takurange apa
Nilanging i Masusi
Nihangke su hiwang Duata
Nitondo su omaneng
Mamoto woba
Mamihetang taghaļoang
Mawuna su apengu rame
Su lighareng u hiborang

Mawu Ruata dorongang panahimata
Hombang daļai ipakagighe
Kebi lawe matana su likurange
Sasakene tawe mekapura

Komentar

Tinggalkan Balasan

Alamat email Anda tidak akan dipublikasikan.

News Feed