oleh

Puisi-puisi Bahasa Sangihe Jolly Horonis (Bagian 3)

MAĻUNSEMAHE TAUNG BUHU

Taung natamba taung negaghanti
Natamba su watangeng nugaghanti su sakaenang
Su watangeng natambang kaļaumure
Su sakaenang nugaghanti wadoane

I upung laumbure makanandu umure
I sahintinuwo makatinalung tatuwo
Kere su taung kinampehongang
Kere lai su taung kinatarima
I Ghenggonaļangi tuļumange masatia

Ikekapendangeng su watangeng
Kapaļusang utaung buļang mugaghanti elo hebi mededaļiu
Kakendage tuļumangE si sia nangilembong saria
TuļumangE melelahiking
KakendageE mepepasombo
Ia sukaļaļunsemahe

2020

DARALOKU

Tumatengo elo su kasasusa ore lai su kaļaļuase
Tumatengo elo pia beladene ore lai mapua su kaļaļenehe
Tumatengo elo su kasasaki ore lai badang su katatoghase
I kami mang nasahampi su taung aļamate

Su sentinia elo manahimata
Su sentinia elo mangintanude
Su sentinia elo mangaļamate
Su sentinia elo
Su sentinia kapapianU

Karaloku su koaU marange
Dalo semba ipegio

2020

PUBAWUKIRANG

Su ļaudu endumang
Bawera ini nipebawantele
Su senggo nedaukalu daku niwawohe
Nihopa i matatimade
Timenting su lrangi masusi

Kapaļusang utahiti dentangeng keng uaļamate
Kakendage naonode bou pusung uļangi
Nakaļaļending utana timopang nakoa ingate
Pebawukirang sematang i Ghenggona Ļangi

2020

MEDEDEKENG TIMBAĻATUNG BATIANG

Mededekeng timbaļatung batiang
Mamanda buļang maniala bituing
Buļang simenang bituing kimerong
Simenang aļamate kimerong daļuase
Su ļangi marange pia mananiala

Mededekeng timbaļatung batiang
Mededekeng nandu umure
Dumangeng su timbaļatung
Dangeng pakarangeng
Sumengkang su tukadu aļamate
Sengkang pakasengkang
Dangeng ndai dangeng
Sengkang ndai sengkang
Dangeng su kaļiomaneng
Sengkang su kakindoa

Mededekeng timbaļatung batiang
Mededekeng sinasa tumengo peseketang
Pakatoghase pakarariahi
Bekise taļikise katatuļase
Hengkung kelung naung marinda
Hengke tede bara pangangimang
Kaļiomaneng abe kiwuļei
Su kakindoa tuļumang pinedorong

2020

KERE PUDUDINGANG TAHITI ANGING

Mageng seng dumenta
Denta singakarenta
Denta pia tialane
Singkarenta pia dinganenge

Denta singakrenta
Denta mudedingang
Singkarenta kere anging
Mededingang umarondosang

Denta singakrenta
Kere denta anging dang utahiti
Dentane mudedingang
Su darentane pia legene
Dentane mugugawe
Nutingege samurine

Anging tiu ndai tiu
Tahiti nawo nae kanawo
Bou rasi sarang bawa
Bou rade sarang dala
Kebi napatiku

Dentang kaļaļuase
Su weda ore lai su wuļudang
Nakapungka kalu masarinda

Mundange kaļaļuase
Kere anging dumendingang umarondosang
Kaļaļuase seng napatiku
Kumbahang kahakang kalu baugu suwusuwu

2019

RIANDINU NIONODE TAHITI

Apawe sadape’e musambong tahiti
Su tempong runia marasehe

Tempone metatahiti
Delang hiwu namikung sarang pupuso
Supududasehe desembere
Riandinu naonode

Badangku nibawala
Taghunalangeng apang ko susipirang
Hiwune ake narondose bou lrangi
Nudedingang hasue pendang su naung

Napalriu marange naung mangantibe dentanu
Napalriu lrabo harape mukukati songonu

Nanginsulrung pendangku
Lrangi nangilembong taikatika
Sipenta maelung singkatempo netetahiti

2019

BEKENG KAPIANG GAGHURANG BAWINE

Kere i inang nepamuko paļahana
Mamuko mambeng pia bawunganenge
Pakawahansang takaradeau ta sau kahumperongang
Paksikome takaradeau mupeti sukaļaļunsemahe

Kere i inang namowo paļahana
Namowo bawowone ukakendage
Bawione biong pudarame
Mebiong balageng mehakide kaļipoho
Mebiong ļangi susi sombo tuwo su katateling

Kere i inang su pudimpoļongang
Elo pedisang mang su kaļaļending
Tumatengo hebi takararungang
Baļe nasuku udaļuase

Kerene kasasabare i gaghurang bawine
Manandu tawe sihinge
Dariahine pangangimang
Kuate dentane mambeng bou rasi
Kebi pinesarakang su kaļiomaneng

Inie haļe seng pinetarima
ArengU ia pakasusi
KapaluNu kariadie
Su raļung baļe
Su pudimpoļongang ini

2020

TIWA SI INANG NANENTUNG

Nilanging su kasasangi
Nianang su kekakiateng
Niwawohe dingangu ake umata
Inie tiwaku si inang nanentung

Marengu tanipesombang
Su pesasemakeng seng taapa wera

Su tempong pinetatentang
Su koto umata eloku kinamara

Su kinaļesa ake umata
Ia mang dudaļiogho
Sangiku sangi pesasesile

Antibe antibe pusasombang
Riandi dianding kaļaļuase
Su samurine pinetatentang
Menentang seng tamusuļe
Ia kinatentang

Ikatedokang ake umata
Badangku pumpendangeng mahaka

Elo pinedaļiu
Kinarendung usasangi

Naung peparasingang
I inang ipekakarimang

Sangiku sangi makakeka
Haghing daļawangku kinakoa sesile

Memaļise kapapiane
Elo seng tamawaļi

I inangku seng su kaļaļuase
Pai su ļangi masusi metetampa

Sasasae itetahendungang
Kapapiane itetiwakeng

2020

PULONSANG

Inie daku ipekata
Bawera seng tamapoto
Mageng pia saļa supekakata
Pinesasaļa kai su naungku

Tamapasumaļe su naung sematang katataku
Katataku banggile bou naung mekakadidi
Kapulu naung mambeng pia daļenge
Pukakapulu napanentang keka su naung
Tetahendungang apakoa sirita su naung kinaherang

Inie bawera nipatumang su pupusonu
Niposo bou pusungu winawa
Nilanisang ake bou ļangi
Nisasingka biwihu daukalu
Niraroho su anging nawawelo

Konsang mukakonsang
Balisa mebebalisa
Arengku koa lauwuse

2020

HIABE

Mamanda u tambaru mekakarima eng hiabe
Kinasiļung si wawu nangahiwuang
Puļukane masuhampa
Su pusige’e botone namuntia

Hiabe ene’e daļuase
Ipekata we apa kebi mang pakasunaung

Hiabe kai katateling
Ore lai kasasabare
Mebisara arie lumawang
Manuļude pia tatarangenge

Pia habare bou tonggene
Dadakele menongkati lurangu tambaru nitononde
Hiabe kinaholo
Su limangune kinaenede elo umata

2020

Komentar

Tinggalkan Balasan

Alamat email Anda tidak akan dipublikasikan.

News Feed