oleh

Puisi-puisi Bahasa Sangihe Iverdixon Tinungki (Bagian 6)

DERE

manĕnsing pĕndang
manĕnsing pĕndang
pĕndang nudaukalu
nanaghipo dere

dere lulente
lulenta sukotone
sukoto kalonge
pĕndang dimere

mĕbawatu maᶅupa
mĕsahingtandung tanikanange
bĕntihe sasangi
nanĕntang liewehe

GHASA

dala ghasa
dala ghasa
dudĕli sukoto
dudĕli supeto

dala ghasa
dala ghasa
hiwune pato mĕndiko sasasa
umaᶅongko tawe ghasa
tawe ghasa kukio

susinda sughasa
sumindu sughasa
suᶅĕmpang ghasa
suᶅaᶅĕng ghasa

ghasa ukara
ghasa masusi
lanisang marange
nanualage bio

bione gampa!
gampa bou gampa
gampa bou ghasa
nisasa umasusi
lanise sasahara

GULAME

sai nubawa ake
suposou winawa
nakaghĕsi wango
nakakoa guᶅame

tĕhing guᶅame
nakaᶅinso pulung
nakoa tahĕndung
datung biahe
taiĕdone mutuᶅung

karaᶅaᶅuhe wango
kasasana wombokang
Mawu mang kere inang
mĕdiahi hiang

guᶅame bou inang
tehine mang dingang
nangĕhi tĕntiro
nanamang kapapiang

TAU MASEGE

bawera tau masege kere kakati kaᶅongan
mawuha suᶅimang makati sarang duhi

gati tau masege kere rimbolong bango boko
bilose su biwihene ikasilo mang daᶅai lohone

hĕbi ĕlo takaᶅiuang bawerane
maᶅukadĕ bawĕlo tamawawau mulahose

kasianga tau masege kakedae kere dampelose mateti
mapĕlo sukumoᶅang naᶅahawuse kĕbi taumatang

koapa sasegetang inang amang
ndai singongo komangpia orase mapĕlo

doite singkarong arau kakala tai kasuᶅungan
mang takoae simpedi ikawawa su sakaeng binawa

areng marange ariwe range lai doᶅong sasegene
mahurupe sukapapia mokoa aaha muleto kakendage

SAKAENG LESU

kasiang ariwe sake sakaeng lĕsu
ko tamawantugĕ sarang pamunakeng

mawuna we suapa
kere naparung su ᶅaᶅeng tawe tatialane

metung masina tambang dalung
mang mawontoᶅĕ su sasi madaᶅung

metung senggo tambang kaᶅiomaneng
berang kereapa sasilaka nidadeakeng

ketang manu mengkilo sudadorokang
taumata mateling kotawe kadaᶅeokang

KEMAGENG SU KOTO WULUDE

kĕmageng kau su koto wuᶅude
tahĕndunge mangatuari su wĕdae

onggoko daᶅeng su tau samuri
sumaka mudea tadetene

ariwe hĕntang dangene
seng taikasilo kereapa gatine

bawa su lĕsabe sakaeng iuᶅidĕ
biahe ko musuᶅung daᶅeng tumĕpase apeng

kasiangsiangnga tau tanakarea daᶅeng
kukaka tai karingihang, kukia tai tĕhungang

kemageng seng marange kai
seng tamaka toto dempuge masana

ndai ko masana
nitangabe mubiala ondoᶅe kasasusane

BEKENG ANA SAMURI

su tempong horo
ana samuri nihiking su susane

su tempongi
ana samuri tawe baᶅiawane

sipire paka sipire
kĕtang mauᶅi subekene

onode tingkaonode
nakoa batang tawegunane

pai su sitaro
ngarangara katoang ᶅabo

baᶅine gampang kaᶅabone
kĕbi banuang nilahekune

kĕmageng ikau nusaᶅatiti
singkanawo nipelohe kere baᶅawo

o pirua ana samuri
kere bĕngkeng ansuang bakeng

tumuwo maᶅaᶅuhe
mang masungkude su kombang politike

TEMPONG SAWENAHE

dasi su sangihĕ ĕgĕgua
katiue sawĕnahe marasai
singgĕsa sakaeng nubaᶅintakubĕ
suapeng iupung simĕna sasangi

o darua tembonang marange
e pai naonode lanabĕ su hangke
simbau sarang kuaneng tutiring
simbau sarang kuihi mangantibĕ

su apeng mengkete kakakae mangarario
kumaka apa bageng tuᶅi nataka selihĕ
ungkung gaghurang sasasa horo abe papĕlo
pakadisie su ĕlo su ᶅeto apang mapia

kai dasi su sangihĕ ĕgĕgua
sarang sinasa nawĕlise tanakaonggo
pirua paᶅahana kadio
naĕmpisĕ laede isire ko mararange

Komentar

Tinggalkan Balasan

Alamat email Anda tidak akan dipublikasikan.

News Feed