oleh

Puisi-puisi Bahasa Sangihe Iverdixon Tinungki (Bagian 5)

DALENG PEBAWIAHE

mĕtiroᶅong langi
mĕtiroᶅong mamenongkati
daᶅeng suwahani
uᶅing meᶅoᶅong bahani

pĕbawiahĕ kere kalu!

mawae maᶅĕka
toghasene suhamu
katatoghase hamu
dudadĕka sulaaha Idatu

LAWESANG SASASA

mĕtirolong ᶅangi
lawesange sasasa
katĕhungang lulenda
kĕtang naung nasasa

sinasa bou datu manĕking naung
naung rinda kukero tamaposo anging

kamageng tumuwo
tuwo masuhampa
nasasuang sukaᶅiomaneng
mahuᶅĕnding tampa

bahe daki tamakaenso peto
Peto nikĕtau masusi
mawuna sukadadĕmahĕ susi

TATIALA

bou imarange dasi
simĕnang kadadĕmahe daᶅuhĕ
matuᶅide su wowong pusige
nemuka ᶅangi
nangĕtau pĕbawiahe

kukero naniala
lulenda nanata
lempang iwawahaning
takatuwangeng daki

TANATA

pia tanata su Mandolokang
daᶅai abe karoro, mapia kadeho

sasasa ndai pĕlo su peto
su sakaeng biahe masasenggo

kemageng sumaka sarang binawa
tentiro mengaha ᶅangi susi marange dasi

karange koto kaᶅiomaneng bou hamu laharape
bou dukalu kasĕlaheng

biahe i kite kere leto su ĕlo
naparung su bewĕlo

kapia sinasa mapĕlo
sarang paᶅiaheng botonge mahagho

susirung su tanata
singkasirung sukapapia ruata

SASASA BIAHE

suangko sasuang sutempong maᶅukade
tadeako bawĕlo piako tumowo mĕdaukalu

ndai umureko pia tempone maᶅaᶅuhĕ
mahaka mapia ipubio pulung sukalaliage

kĕmageng ĕlo sihĕlo kĕtang mulĕno dego
orase kimoho takoae dareso mĕtung simpoho

kasiang amang kasiang inang
ndai sombo kapapiang su hiwang

selo mapia katĕhungan tipune
paᶅahana lulĕge nikanang liagene

MULANGING BIAHE

nilanging bou kalu nisuangu Masusi
nihiking tualage niteingu kakaᶅiomaneng
banggile kotone seng nawohe suᶅangi
unide sutatoghase nipile kipung kakendage

sakaeng kobiahe doᶅongnge matatape
su woba sawĕnahe naung mang maᶅenehe
nikalabe anging petone mang sutataing
mapero tamai mang musuᶅe tuhu kakĕtabe

pantuhu sasaᶅintiho somahĕ mang kai kehagĕ
dumuhu meliku sumowa mang susoang laharape
kemageng nangkhodane mang hapi mapia
tumuwo timendang sukukero lĕnggihe intang

BIAHE

nighaᶅa boau sasasa
nasasa nakoa sinasa

nituwo suᶅimang maᶅaᶅĕnding
natamang sunaung masusi

tumuwo marange nakasĕnang kapapia
natamang maᶅaluhe nanaᶅĕnding banua

bau aᶅungu binawa malolong su langi
bau hamu sarang towoe dasi nakoa bengi

TATEI KAPAPIA

ndai huso, ndai lawesang
ndai apeng pia dingkaᶅeng
mĕnalang marimbolongang pia tampane
maᶅupa mĕsahingtandung arikawuᶅe ᶅoᶅong

dingkaᶅeng idatu nanawuhĕ bio
Suᶅaᶅeng marau banuang mang taikasuᶅung
huso lawesang nitutiu anging
ingang suwadang penanahuᶅĕnding doᶅong

bou kadio
bou kadio ake sangiang nireno
gampa limangu lulenda su manuru
mawĕngi kere lanisangu masusi
pinanaᶅuhĕ tatuwong
pĕtatei kapapia

daᶅengke polo
saka wuᶅude
tatempangeng ᶅangi
lempangeng ᶅaude
simbuᶅe tamaᶅaᶅĕsa
arikaᶅĕsa naung mapia

BERANG TATAHENDUNGANG 1

suaᶅung binawa
kĕbi tamakagaᶅa ᶅangi

bou hamu lelang mĕdaukalu
bou kapai tatĕhi maᶅoᶅong

apang nĕdaukalu pia koto pia banggile
nasĕpu marondose orase mangkadaᶅeng

limente ngalo pai ᶅaudĕ makaᶅĕkabĕ
uᶅing sasasa ᶅawesang ikasĕbangeng

ndai…
ndai sombo amang inang
sombo susingkasombo
sirung susingkasirung

bou hamu lelang mĕdaukalu
bou kapai tatĕhi maᶅoᶅong

BERANG TATAHENDUNGAN 2

mangoto daukalu
pĕdorong su maᶅaᶅĕnding
kĕbi kotutuwo
pia datu nuhiking

tuwoko katamang
katuwo katamang
uwusĕ tumuwo
taikaposo anging

bau tanah sarang binawa
kĕbi maᶅoᶅong su masusi
supaᶅede masusi
kotutuwo mughĕsi

dasi
dasi imarange nanahuhampa kalu
kalu mapia lĕhasene maketi
toghasĕ bou imasusi nupuhĕngking badang

ndai panuwang
tuwang banggile ᶅĕka kotone
batange sakaeng, lelange baᶅang
katagoghasĕ naung, rinda tatondone

Komentar

Tinggalkan Balasan

Alamat email Anda tidak akan dipublikasikan.

News Feed