oleh

Puisi-puisi Bahasa Sangihe Iverdixon Tinungki (Bagian 3)

-Sastra-1.163 views

KAĻIBĚMBANG SU RANOU MAKAĻĚHI

Pia kaᶅibĕmbang
Simĕbang
Bou pĕndang nawembang

Lumiku rano mĕdea lelangi sangiang
Polo sangiang kĕmageng seng nailang
Kere menggaᶅa winawa su rano tai kasuhungan

Su wiwihe rano mangkete lulĕgeu wungang
Hiwang lawesang mangenede bĕngi
Dundangku suipi tai kasuᶅungan
Nemuka tudung liangi sasangitang

Pirua, daᶅuasĕ rano saᶅumisi bĕmbuᶅaeng
Sasulinge nawae namuka sĕgang bawĕlo
Limente suwadang kaᶅibĕmbangku nanawo
Tatĕlane naᶅĕkabĕ nauhu nipikung ngu ᶅumu

Toghase badang kere marondosĕ
Nuᶅamudĕ su koto ake nitudo sĕsilĕ
Sĕsilĕ susamurine ipuhengkingapa
Nasĕsabĕ supĕndang, nalese suĕndumang

BĚKENG KUKO BOU KAMPONG LĚLE

“Su wuᶅudĕ Para pia singkalu kaᶅisusu e
O timuwo su watu, o upasasuba matimadu e
Endai ngiang, endai ngiang, ngiang mendigu petone
Ku kai koateng hiwusaᶅang sembanuane”

Bĕkene, wawa su wĕdae dĕlahe mangkete warĕsi
Niwarĕsi ikuko dingan kakaehe bou timbung bango
Bango maᶅaᶅuhe taka awikang, taka potokang
Timuwo bou tempo medadaᶅiu
Su kapulung makawasa liung kawasa

“Nasongo bau manaro e ia nakasilo gatine
E simĕnang, e simĕnang tatualagene
Kere wungang timuwo sukakaᶅiomanenge
E kasasuku matinalung su tĕntanubĕ ko maraᶅĕndinge”

Nau kuko,
Suĕlo hĕbi mangkete ikapĕndangen piako natuno
Natuno kere dasehe su maᶅukade marĕndung
Kere daraselang nitĕntang kipunge
Ketang lentege nanĕka naung
Tĕdune ikatemang kĕtang kau undange kuko

“E kuko ndai ko onggo paᶅedenu
O pelo su sĕba kakoa taᶅĕntu
E binawa mawira su ghatinu
O ndai penahuntĕla dingang pĕndangku”

APENG UĻU

su apengi kite horo mutĕhung dingkaᶅĕng
munalang su hamune dingang buane
muliwua sarang pisi mawiru kukende
mangampaᶅĕ ĕlo sumĕda
muhena mahamu su ᶅangine

kamageng matangĕlo simĕda suᶅimang i mawendo
dasi su mohong awu menomeno medorong sĕmbah
ndai karanine sakaeng bou wiaho dingangu taghuᶅandang
nĕbawa busa, duku dingang apang lohong banuane
sutĕngong pasare nawuna lai singgĕsa bou Para
nĕbawa pinĕkuhĕ dingang kina tapa

tempong pasare, Uᶅu mang takaᶅawangeng ramene
manga ana usĕmbau bau rukune dimĕsung mudea gawene
bou tempong datungi kite
sasulinge mang pasare pesasombangeng

namang mutahĕndung apeng Uᶅu kereii
mangkatahĕndungang uwenteng bou tempong iamang Watahi

bĕkene makahĕngkase dukuawa
ade pia sasangine nareso bou tempong nupapate
baᶅine mahaᶅi mangawahaning nalese
asaᶅe banuang kite tai kaghaᶅa tau babare

BERANG MATĚLING

tau matĕling ikakiᶅaᶅa subawerane
matatape deᶅentene, matatape lai sasasane

metung gatine pia ahine
muntia papande ko su naunge

kimĕse bau naung bawera marange
makatiu bahe, makagholang sasangi

sai tasumangi sukawawĕngi winohe susi
mulanging sakaeng, sinasane sasaᶅamate

kumaka tamaka kaka
ketang naung nangenede ake sumata

kemageng dimarisi ariwe pandang bolᶅa lakune
suliungkarangene netingkasana sie kere ebung sudempuge

Hapi susi bou sorga marange datune
limintu surunia hentang kakĕndagene su taumata

dahane natumpe tadea kita mapĕlo bou sasilaka
tumuwo masuhampa, pesasirungan apang paᶅahana

KLIKITONG I GHAGURANG

dasi dudaᶅĕdu dimesung bou tampuna
klikitong i gaghurang mapakaiboru soang tarorane

tagonggonge bou kalu nipile su eloNe
nanaungange bou kipung nihana bituing putung

tingihe ene makadĕli naung nairi
makaghenggang sisire tawe sasaliline

naung daᶅai kimoho, naung mapia kukero
sasalaine nuhengke sasasa marange

waugu bou marange kapapia timedo
mawĕngi kere lanise su wadang iyupung daute

kararange kawasang daute
mang kimia sutengong Mawu

embung ditambung su wadange
nutingkasana su laede Yupung Kasaselahenge

kemageng klikitong bou marange dudellu sutadentene
balagheng banuang seng nikakawing su kakendagene

laude tutipu, buᶅudene dudaondoᶅĕ
sasaharane mang mangaha kapapiane

ndai daringihĕ lagung susi nionggo Hapi Makendage
pundaᶅĕ singkapundaᶅĕ, toghase aᶅa su pung tualagene

MANU PUNTENG

sihĕlo su lasiri
sihĕlo su lehingambeng
ĕloĕlo muᶅeno kakangianeng
magurang takoae ikaneng

kere sego manu punteng
hambake kĕtang dumaᶅĕng
katĕlae lumiku daᶅĕng
pondoᶅĕ nahutung suᶅaᶅaᶅĕng

dumaᶅĕng tawe naunge
mahumpa tawe rĕgane

BAHANINGNUSA

teking isai pai napapasi su wuᶅude tamata
mang kukero tehungang bou apeng uᶅu

taking i yupung matĕling nakakoa kararatuang
napasi sau su kawahaning i datu winsuᶅangi

kawawahaning ene nekoa sasasa manandu
sinasa i bahaningnusa mendiaga banehang sekasaka

baneha su peto sakaeng i hengkengnaung
su ᶅimane bara luhena putung i aditinggi

kemageng banehang seng nataing su koto u naung
tawe takune susirung su kelung ikĕbi yupung

muᶅaude sarang kararau ᶅaude
tagonggonge matataing surange ᶅangi

i datu dingang pulunge singkabekisĕ tingguhu
mawengi kere mauhala, demeli kere putungkara

HUNDUGU U SAKAENG

Mĕbua bou hangke pia bawerane
metaing doᶅong pia dudatone

ene hundugu u sakaeng
doᶅong dingang uᶅinge susimpoho raramene

daᶅĕng singkaᶅaᶅĕng, lempang singkaᶅempang
darodo matĕlang mepapahia kai daᶅong kahĕngang

toghase banuang mawangung kere woiang
tinendeng su medang lidana pello su waᶅang kama

kapapia buᶅang limangu nihundugu limang ambia
bahe marasai taikatemang, kakaᶅiomaneng tatahuᶅendingang

MĚBIO ĻAUDE

sangi i Uring Sangiang nakasombo banuang
nasombo wou taghaᶅoang, timuwo nakoa pĕsĕsirungan

dasi Aditinggi kararatuange
sutaghaᶅoange Mawendo mĕkoa dame

ndai bio wou tempong Badoᶅangi
–wera daᶅai kanawo, wera mapia kadeho—

kapia kere daroa nedaukalu
maraᶅuhe nĕkoa tatialang ᶅĕsaba manandu

ana u sengkatau mamogho mataᶅĕntu liung taᶅĕntu
ikasilo su gundene daᶅaᶅĕng pato sulenehene

isai mataku ᶅaude tamahumpa apeng kendagene
biahe kotakonsanguapa ghenggona nangkodane

PUNTAĻĚBA

su siau pia tampa arenge puntaᶅĕba
su bangile bongkongbunu seng nahata

kere bĕke maraᶅĕnding manu kemba u langi
tahanusangkara kinawantĕli bou sangi susi

sutempong datu Lokongbanua nĕkoa soa
ondong uᶅu pĕkakauhu daᶅuase masaria

balagheng luhaung su pahesu masusi
nanualage taᶅĕntu su manga ana u sengkatau

su tempongi puntaᶅĕba napohong bou tampane
nasapua kĕbi bĕkene bou kararangetange

baᶅagheng kere lelang nairi bou batange
naenede nitandang ᶅĕba isire tawe liaghane

Komentar

Tinggalkan Balasan

Alamat email Anda tidak akan dipublikasikan.

News Feed