oleh

Puisi-puisi Bahasa Sangihe Iverdixon Tinungki (Bagian 2)

SASASA ESE

Nihiking bahe
Nihiking daki
Daraselene sĕlihe

Tiu tutiu
Sawĕnahe timuhĕ
Mĕpĕdĕrisi lua sukoto lanabĕ
Kalang kukalang
Wadang tawe sĕgane

Bou maᶅambe dasi
Seng nitĕde wahani
Natĕde lai barau naung
Sutatoghaseu gĕsi
Nauwase apang duhi

Ese kai ese
Ese suᶅuᶅunge
Ese lai sulaudĕ
Toghase puᶅune
Toghase lai horone

Mutaing doᶅong
Tawe berane taimaᶅoᶅong
Kemageng niketau mohong
Naung wadang kebi singkaᶅoᶅong

SASASA U KAPAPIA

Dumarisi sukotou wuᶅude
Dudarisi sukĕtau tuᶅidĕ
Kasingang apa tama wae
Tamairi bou tĕbung daukalune

Toghase tutuwo supaᶅĕdu masusi
Meᶅaᶅuhe marange taikapĕding bahe
Kawawahaning tĕgi dudoro sulelange
Masahampa pĕsĕsirungan bau sĕnsang pĕdisĕ

Naung tutuwo kere kalu tamata
Makoa hiang suapang taumata
Bungane mawĕngi manguwusĕ sangi
Buane matĕhi mendiahi kakĕndage

SINGKATEMPONG SU TAĻISE

Su Taᶅise pia tampa singkompeng
Soᶅone kukero
Kere ghasa laonggo tualage

Ndai tongene kasingkateng
Kasingkateng lai sĕlihe bĕladene

Kaᶅaᶅabo bĕlade mang pia lawesangnge
Kaᶅaᶅabo kĕndage mang pia bawerane

Kĕmangeng iketa bou mapia
Pondoᶅe lai seng ikatika husone

SINGKATEMPONG SU BANGKA

Dasi su bongkone kukero ĕhe
Nitiu anging bungane nahengke
Hamune nudating wĕdae
Wungane nakagaᶅa winawa

Ariwala biahe maᶅeka
Mebawatu apa taikaĕna
Maᶅupa mahaka
Pondole tanikatika

MUTĚHUNG BOWONTĚHU

Mutĕhung Bowontĕhu
Metataking sasaharane
Bou apeng sarang kehune
Seng nowohe sasaliline

Ndaong sugahĕang simĕnang tolokene
Sutempong datu sarang ana samurine
Bahasane mang sangihe

Pia anau baᶅine mamohe beke
Adeu Bowontĕhu soang sire
Kai kobaᶅaghengngisai nĕpĕrĕrisi kararatuange

Ketae mang bou datu marange
Humansaduᶅagĕ Tendengsĕhiwu
Nepeᶅintu i Mokoduludut Abunia
Kararatuang dimarisi
Laudene pia banehane

Ndai sake itarima
Simbotongang sake, samurine nakoa dingang
Dingang mapia mang mutahĕndung kĕtau wadang
Ariputaghuang uselo nipasi ampuang

Sake mutaghuang banuang
Kere ansuang menggĕde banehang
Kero ingang sumĕbang bou wadang pulung amang
Magholang kĕbi kapapia seng natamang

SU APENG BUANG

Su wĕdau Buang limbawua marasai mawira
Lawesang daluasĕ pamunakeng sakaeng

Tumpa singkatumpa
Nisingka bĕngi darurung kina tongka
Sasulinge yora humaung mundeka
Tualage naung nikasingka suwera

Wera mapia penahuᶅĕnding sombang
Sombang sinsule kapiane tamalĕka

Su apeng Buang
Hĕbine kere tamaparung
Maparung karapa bĕkene mekoa lĕge
Naung natuno sukapapia taune

Elo samuri mangkĕtahendungan tau sĕngkatau
Kĕmageng kapapia takawuᶅenang maeng seng marau

SINGKATEMPONG SU WIAHO

Dala su Lamanggo
Su aᶅungu binawa
Daukalu biru nawae su tanah
Kapapia ruata nikasilo su apang mata

Elo naᶅĕkabĕ kere batang bawĕlo
Medating tadetene namuhe timĕdo
Mĕpapatuwo kapapia Mawu su mangarario
Ndai sombo penggaᶅa tĕntiro bou maᶅondo

Kapaᶅĕ naparung tongene natĕntang
Ringang mapia mang maotong suĕndumang

Tamai mutuhu daᶅeng
Ebung nahengke kere tipu nitiu
Soane ikasilo mundeso bĕke
Singkatempong narating naung natentang
Kapapia taune kare elo su naung inang

SASASA BIAHĚ

Suangko sasuang sutempong maᶅukade
Tadeako bawelo piako tumowo mĕdaukalu

Ndai umureko pia tempone maᶅaᶅuhe
Mahaka mapia ipubio pulung sukaᶅaᶅiage

Kemageng ĕlo sihĕlo ketang muleno dego
Orase kimoho takoae dareso mĕtung simpoho

Kasiang amang kasiang inang
Ndai sombo kapapiang su hiwang

Selo mapia katĕhungang tipune
Paᶅahana lulĕge nikanang liagene

MUĻANGING BIAHĚ

Nilanging bou kalu nisuangu Masusi
Nihiking tualage niteingu kakaᶅiomaneng
Banggile kotone seng nawohe suᶅangi
Unidĕ sutatoghase nipele kipung kakĕndage

Sakaeng kobiahĕ doᶅongnge matatapĕ
Su woba sawenahĕ naung mang maᶅenehe
Nikalabĕ anging petone mang sutataing
Mapero tamai mang musuᶅe tuhu kakĕtabĕ

Pantuhu sasaᶅintiho somahe mang kai kĕhagĕ
Dumuhu mĕliku sumowa mang susoang laharapĕ
Kĕmageng nangkhodane mang hapi mapia
Tumuwo tumendang sukukero ᶅĕnggihĕ intang

SASAĻAMATĚU PĚSASOMBANGENG

Limintu pantuhu lumempang somahĕ
Mamuka saluhĕ menahuᶅĕnding bawera
Pĕhadĕ su wuᶅudĕ asing sutaghaᶅoange
Natehi su marange nitaking Masusi

Dimĕnta bou marau nanawuhĕ bĕngi
Nusa kinawantelang naᶅamude sangi

Saᶅamate amang, saᶅamate inang
Ndai kaiang suhiwang Ghenggona
Su singgatang kakĕndagu Hapi Mapia

Pesasombangeng apangu nawembang
Simĕnang simarang su ĕlo kukero
Ělo mapia su ᶅenehe naung
Nitaingu Masusi susasĕmbua wera

Ndai wera daᶅai kanawo
Wera mapia kadeho
Bou daraselangi upung
Tĕdeko putung kapapia naung

Komentar

Tinggalkan Balasan

Alamat email Anda tidak akan dipublikasikan.

News Feed