oleh

Puisi-puisi Bahasa Sangihe Iverdixon Tinungki (Bagian 1)

MAUHALANG SANGIHĚ

Mĕbio mauhalang
Nudating bio kinawaᶅang
Nĕtatĕde bara
Mĕpepalaho lĕgĕne

Lĕgĕ susĕnang lulente suhĕbi
Menaᶅumpite pĕndang temang mapĕdi

Ho gatine kere lamude apeng
Warĕsi kare winawa susi
Tehungang kumende
Suhungang maka rĕka gĕsi

Bĕkene bau ake sio
Pia bidadari dimere
Nanentang Pahawo
Nanawuhe bio

Bio ene nudating kinawalang
Mauhalang Sangihe
Nakagholang naung
Nakagĕde badang

TĚNTIRO GAGHURANG

–Kĕtang manu nungkilo su darorokang
tĕntirou marange kasasana wombokang
Wombokang mapia nakatĕno ĕlo
Elo mapia nakatuwo kapapia

Kasiaheng tutela marange taikaghaᶅa tatĕlane
Limintu manahedĕ nakaghĕde dame
Mubiahĕ marange su kinoang tampane
Wombokang su ᶅohang tanikasilo kasadadane

Inang amang
Baᶅine gampang ĕlo dudĕnta
Dudĕnta lendane, dudĕnta lĕnggihene
Su daᶅaᶅuasĕ naung nae pasi henane

Hena mapia ariwala katandangu ᶅĕba
Simindu suminda netataingu rĕga
Tĕntiro gaghurang nawuluse sĕga
Naenedĕ kebi susiu wera

PANTUNG SANGIHĚ

Maraning kuala
Maraning buala
Buala tĕmboe simbua
Kombange taikarĕpa

Maraning kuasa
Maraning sasilaka
Kuasa tĕmboe simbua
Sasilakane piranggĕsa

LOKONGBANUA

I sie dudarisi
dingang kaᶅibĕmbang su ᶅimane
Kaᶅibĕmbang nunahundingan
sukakimbu orase

Elo netudo
Matane seng bawĕlo
Gampane kimoho
Uhisene naᶅongko

“Banuang batangeng seng nailang
Sake seng nutataghuang!”

Kila tutĕla
Nanahede bulude
Kalu ĕngi nangondoᶅĕ buane
Mahamu
tawe bĕngine

Limente sie su pung tamata
dingang kaᶅibĕmbang su ᶅimane
Kaᶅibĕmbang bou tempong
Kararatuang lulenda

“amang!
Kara narange, putunge lulupa
Aku tutune suapa
Nawaning kebi saghede su ᶅua”

Kasiaheng lima
nuᶅiku soa
Kalu nagha
nangiri lelange
dingihene kere sangiu roa

limempang sie su koto kara
dingang kaᶅibĕmbang su ᶅimane
Kaᶅibĕmbang bou putung
tamaka gagha

“Banuang batangeng seng nailang
Aku tanata nitahunalang”

Utane limĕnda
Matane dimĕli
Kaᶅibĕmbange timĕla
Namĕka koto kara
Nangede putung
Manutung sĕsile
Suapang pulung

dinuhe!

GUĻAME

Sai nubawa ake
Suposou winawa
Nakaghĕsi wango
Nakakoa guᶅame

Tĕhing guᶅame
Nakaᶅinso pulung
Nakoa tahĕndung
Datung biahe
taiĕdone mutuᶅung

karaᶅaᶅuhe wango
kasasana wombokang
Mawu mang kere inang
Mĕdiahi hiang

Guᶅame bou inang
Tehine mang dingang
Nangĕhi tĕntiro
Kapapiang gaghurang

KUKO POLO

matane binohe
Tutuno
Nakasindu naung
Nakakio sinda

Laude timipu
nuhĕngking lanisange
muᶅamude ĕlo

Uhisĕ naung kukoho
Kimoho
Kere huso nakompeng
Soha nawoᶅeng

Pai pisine lulenda
Lĕgene gampa

Datu!
Puising boheng karapa
winohe ndai seng nasasa

Sinta,
Bau takaĕnange timuwo
Nutowo
Nukoto

Simĕnang
Nanaᶅĕnding binawa
Nutaing tatĕla
Nĕbawa ia timĕla

Tutĕla sulendane
Wera nangĕdo
Sastrane limĕnno
Nutuhu ghasa
Nundiko matangĕloku

TAUMATA

Sasĕba taumata kalu tamata
Simipu mĕdaukalu
Simindu mubua

Daukalune pĕsĕsirungan
Buane pĕbawiaheng

Wawahaning sukuihi
Sukuaneng pangangimangeng
Su tembo imatĕling
Su tiang upĕdaᶅahiking

Paᶅahana lulĕto
bĕmbang tampane
Isĕba taumata
Manuwo paᶅahĕntone

TUĻUDĚ

Su hiwang lawesang taung tutondo
Nanentang bĕke apang nunangihoro
Hundugu kaliomaneng nanahulĕnding
Nitaking suelo simbotongang dimoro

Bou tempong ampuang tuᶅudĕ manulidĕ
Mamuka kaᶅimbuhungang makoa dalĕnding
Su ngalo dasi dimarisi apangu matĕling
Manasau sinasa bau sasasau masusi

Ndai supung pakele susinda orase
Maᶅukade mahĕbi mang lempangeng kĕbi
Lawe bawĕntale mĕnawuhe wau
Uwusĕ sĕmbau kĕtang bou Yamang su ᶅangi

Ho ĕlo sihĕlo taikatika
Tutuwo malukade kalongene naᶅĕka
Kare daukalu nanawo niwembang anging
Sai makatika sasampelene suapa

Runia taikaĕna kere sakaeng naenede
Toghase wadang tamakauᶅing petone
Tuᶅudĕ susi kĕtang bou Mawu Masusi
Nanualage naung mengaha pamunakeng

KAKĚTAU WISARA

Nikĕtau masusi
Pondoᶅe sumaᶅondo
Nireno manuru
Begine nutingkatuhu

Kĕbi mang bou ake
Ake nighapa winawa marange
Lulintu su lĕsabe mudea hundugune
Hundugu mapia mĕpĕpatuwo biahe

Ho ndai sombo apang daluasĕ
Limu potokang seng nibĕhisĕ ĕpa
Laonggo wera lulenggo muntia
Muntiau masusi tĕpasene kapapia

Wisara…
Ndai ko lulenda doro su naung
Sumĕbang putung nakakoa tutung
Sumĕbang rinda nakahena naung

MUBECA SU PARA

Mamĕlo hĕsang
Manguwuse sĕnsang
Sintaung singsule manĕntang ᶅowe
Ho mubecae kite!

Pupure ghati
Loho sapatu metung gĕde
Laku bolᶅa tamukapura
Asale naung pĕsasimbua

Teipe salonge taing suroda
Akine napole nasetele mapia
Lagune seng nipilepile masaria
Ndai boᶅeng su ᶅaᶅeng soa

Soa narame
Ramene dame sintaung sinsuᶅe
Gawe ĕge musasambe ᶅima
Munggoyang laede ᶅĕge singkaᶅĕge

Peneko lurang
Naelurang simbaᶅagheng
Karanca dento
Pakaᶅe bou maᶅukade sarang bawĕlo

Komentar

Tinggalkan Balasan

Alamat email Anda tidak akan dipublikasikan.

News Feed