oleh

Ingin Menikmati Puisi Berbahasa Sangihe Talaud? Ini Dia…

Setelah era sastra purba Sasambo, Kakalanto, dan syair-syair Kakalumpang, khazana sastra Sangihe Talaud ternyata terus berkembang ditandai munculnya puisi-puisi berbahasa Sangihe Talaud yang ditulis para penyair angkatan terkini dari negeri kepulauan itu. Berikut ini kami tampilkan 10 puisi karya penyair Iverdixon Tinungki. Selamat menikmati.

KAKETAU WISARA 1

isai nighapa daroa I saᶅuᶅuang banua
takaᶅawangeng runia
takaghaᶅang haghiu sasaluka

hebi humena kerong sonde
eᶅo lulenda kerong sonda

ku’ kĕbi nikĕtau Masusi
pondoᶅene sumaᶅondo
horone kakĕndagu

KAKETAU WISARA 2

isai nireno manuru
bĕngi wanua nutingkatuhu

maiang su pato rendipahe
kukero tentirong susi I marange

ndai kĕbi mang bou ake!

ake I winawa
lulintu lĕsabe
tepasene hunduge wisara

KAKETAU WISARA 3

hundugu mapia nakatuno ĕlo
tutumpe sarang bawĕlo
mĕpĕtatuwo biahe
mepetatei laharape

sombo ndai sombo
sombo apang daluasĕ

daluasĕ I saluluang banua
nakaraki pato liung winawa
nakatowo daroa barau amang

KAKETAU WISARA 4

ho’ limu potokang nibĕhisĕ ĕpa
laonggo wera liung bawera

bawera lulenggo
niketa I saluluang banua
rinda kere namuse lulenda
lulenda su daukalu
namuntia sĕba

muntiau masusi
puhiase kapapia
puhengking udaᶅaᶅai
nakasinda runia

KAKETAU WISARA 5

kapapia wisara liung wisara
pia sasaharane pia sasaliline
bĕngi mawĕngi bou hamu sarang datune

ku’ wisara lai koputung
luhena su naung
dudeli su singkapulung

sumĕbang putung
nakakoa tutung
Sumĕbang rinda
nakahena naung

DALENG PEBAWIAHE

mĕtiroᶅong langi
mĕtiroᶅong mamenongkati
daᶅeng suwahani
uᶅing meᶅoᶅong bahani

pĕbawiahĕ kere kalu!

mawae maᶅĕka
toghasene suhamu
katatoghase hamu
dudadĕka sulaaha Idatu

LAWESANG SASASA

mĕtirolong ᶅangi
lawesange sasasa
katĕhungang lulenda
kĕtang naung nasasa

sinasa bou datu manĕking naung
naung rinda kukero tamaposo anging

kamageng tumuwo
tuwo masuhampa
nasasuang sukaᶅiomaneng
mahuᶅĕnding tampa

bahe daki tamakaenso peto
Peto nikĕtau masusi
mawuna sukadadĕmahĕ susi

BERANG MATELING 1

tau matĕling bawerane taikabihing
matatape deᶅentene, matatape lai sasasane

metung gatine pia ahine
muntia papande tuwone su naunge

kimĕse bau naung bawera marange
makatiu bahe, makagholang sasangi

sai tasumangi sukawawĕngi winohĕ susi
mulanging sakaeng, sinasane sasaᶅamate

kumaka tamaka kaka
kumia tamaka kia
kĕtang naung nangenede ake mata

BERANG MATELING 2

kemageng dimarisi ariwe pandang bolᶅa lakune
suliungkarangene nĕtingkasana sie kere ĕbung sudĕmpuge

Hapi susi bou sorga marange datune
limintu surunia hentang kakendagene su taumata

dahane natumpe tadea kita mapĕlo bou sasilaka
tumuwo masuhampa, pesasirungan apang paᶅahana

SASASA ESE

nihiking bahe
nihiking daki
daraselene selihe

tiu tutiu
sawĕnahe timuhe
mĕpĕderisi lua sukoto lanabe
kalang kukalang
wadang tawe sĕgane

bou maᶅambe dasi
seng nitĕde wahani
natĕde lai barau naung
sutatoghaseu gĕsi
nauwase apang duhi

ese kai ese
ese suᶅuᶅunge
ese lai suᶅaudĕ
toghase puᶅune
toghase lai horone

baneha!

mutaing doᶅong
tawe berane taimaᶅoᶅong
kĕmageng nikĕtau mohong
naung wadang kĕbi singkaᶅoᶅong

(Penulis: Iverdixon Tinungki)

Komentar

Tinggalkan Balasan

Alamat email Anda tidak akan dipublikasikan.

News Feed